Xəbərlər

Kamal Abdulla vəkilliyin 100 illiyinə həsr olunmuş döş nişanı ilə təltif olunub

XƏBƏRLƏR

Azərbaycan Dillər Universitetinin (ADU) rektoru, akademik, Xalq yazıçısı Kamal Abdulla Vəkillər Kollegiyasının Rəyasət Heyətinin qərarına əsasən vəkilliyin 100 illiyinə həsr olunmuş yubiley döş nişanı ilə təltif olunub.

Vəkillər Kollegiyasının Rəyasət Heyətinin sədri Anar Bağırov ADU-nun rektorunun nailiyyətlərinin ölkə ictimaiyyəti tərəfindən rəğbətlə qarşılandığını deyib: “Bu gün ADU ölkədə tanınmış, aparıcı təhsil müəssisələrindən biridir. Kamal Abdulla 2018-2019-cu tədris ilində ilin rektoru seçilib. Bu da universitetdə aparılan düzgün, doğru, hərtərəfli və düşünülmüş fəaliyyətin nəticəsidir. Mən bilirəm ki, Kamal müəllim vəkillik sahəsində də olan bütün yenilikləri yaxından izləyir. Onun dünyagörüşü, biliyi, savadı bizim işimizə də böyük dəstəkdir. Rəyasət heyətinin qərarı ilə vəkillərimizlə yanaşı, vəkillik fəaliyyətinə xüsusi töhfə verən vəkil olmayan şəxslər xüsusi döş nişanı ilə təltif olunur”.

A.Bağırov, həmçinin rəhbərlik etdiyi strukturun gördüyü işlərdən, həyata keçirdiyi yeniliklərdən danışıb.

Rektor Kamal Abdulla müstəqil dövlətimizin Vəkillər Kollegiyasının döş nişanı ilə təltif olunmasından böyük şərəf duyduğunu bildirib və təşəkkür edib: “Bizim ölkədə hüquqi, inzibati ağırlıqlar öz yerini tutmaqdadır. Ölkədə demokratiya gücləndikcə, Azərbaycan Ulu öndərimiz Heydər Əliyevin qoyduğu yolla inamla getdikcə vəkillərə də ehtiyac çoxalır, onların gördüyü işlərin qiyməti əvəzsiz olur. Vəkillik prinsipi ölkənin intellektual səviyyəsindən xəbər verir. Son dövrlər vəkilliyin bu cür inkişaf etməsi Anar Bağırovun, onun həmkarlarının əməyi nəticəsində formalaşır. Arzu edərdim ki, siz fəaliyyətinizi bu istiqamətdə daha da inkişaf etdirəsiniz. Biz də öz gücümüz daxilində sizin yanınızda olmağa hazırıq. Hesab edirəm ki, bu döş nişanı Azərbaycan Dillər Universitetinin kollektivinə olan diqqətinizin bariz nümunəsidir”.